Tarehe Rasmi Ya Kuanza Kwa Uboreshaji Wa Daftari La Kudumu La Wapiga Kura Itatangazwa Baadae

Mwenyekiti wa Tume ya Taifa ya Uchaguzi, Jaji (R) Semistocles Kaijage amefungua mkutano wa Asasi za Kiraia na Tume kuhusu maandalizi ya Uboreshaji wa Daftari la Kudumu la Wapiga Kura Jijini Dar es Salaam leo na kuwajulisha wadau hao wa Tume kwamba tarehe rasmi ya kuanza kwa zoezi hilo itatangazwa baadae.

Jaji Kaijage pia amewajulisha wadau hao kwamba zoezi hilo linalotarajiwa kuanza mwenzi Julai, mwaka huu (2019) litahusisha "wapiga kura wapya waliotimiza umri wa miaka 18 na zaidi, au wale watakaotimiza umri huo siku ya Uchaguzi mkuu ujao".

Ameongeza kuwa "Kundi lingine litakalohusika katika zoezi hili ni wale watakaoboresha taarifa zao kama vile, waliopoteza kadi au kadi zao kuharibika, wanaorekebisha taarifa zao, bila kusahau wale waliohama kutoka maeneo yao ya awali na kuhamia maeneo mengine ya Uchaguzi".

Aidha, Jaji Kaijage amezishukuru Asasi hizo kwa ushirikiano ambao wamekuwa wakiutoa kwa Tume

Mkurugenzi wa Uchaguzi wa Tume ya Taifa ya Uchaguzi, Dkt. Athumani Kihamia amewaomba wadau wa Uchaguzi kushiriki kikamilifu katika kuelimisha na kufuatilia zoezi la Uboreshaji wa Daftari la Kudumu la Wapiga Kura pindi litakapoanza rasmi.

Akizungumza kwenye mkutano wa Tume na Asasi za Kiraia uliofanyika Jijini Dar es Salaam leo ikiwa ni maandalizi ya uboreshaji wa Daftari, Dkt. Kihamia amesema ufanisi wa zoezi la Uboreshaji wa Daftari la Kudumu la Wapiga Kura unategemea ushirikiano wa kutosha kutoka kwa wadau.

Dkt. Kihamia amesema lengo la Tume ni kuhakikisha kwamba wale wote wenye sifa wanaandikishwa kwenye Daftari.

Maafisa wa Tume ya Taifa ya Uchaguzi kutoka Idara ya Daftari na Tehama wamewaonyesha kwa vitendo hatua kwa hatua wawakilishi wa Asasi za Kiraia namna ambavyo mpiga kura anaadikishwa kwa kutumia BVR Kit.

Mwenyekiti wa Tume ya Taifa ya Uchaguzi, Jaji (R) Semistocles Kaijage akisalimiana na mwakilishi wa TEMCO (Tanzania Election Monitoring Committee), Dkt. Benson Bana baada ya mkutano wa Asasi za Kiraia na Tume kuhusu maandalizi ya Uboreshaji wa Daftari la Kudumu la Wapiga Kura.

Picha ya pamoja ya viongozi wa Tume na wawakilishi wa Asasi za Kiraia.