SADAKA Network Kuweka Kambi Ya Uchunguzi Waathirika Wa Matukio Ya Kikatili Ili Wafanyiwe Upasuaji Kisarawe

Shirika la SADAKA network linataraji kuwa na kambi ya uchunguzi kwa mara ya kwanza wilayani Kisarawe Mkoani pwani ikilenga kuwatambua wagonjwa wenye uhitaji wa upasuaji wa kuboresha maumbile kwa awamu ya 5 utakaofanywa na Hospitali ya Aga khan kushirikiana na Muhimbili.

Akizungumza na waandishi wa habari Meneja Miradi wa Shirika hilo Viola Julius amesema kuwa kambi hiyo itafanyika hospitali ya wilaya ya kisarawe Juni 29 na mganga mkuu wa wilaya hiyo atakuwepo ambapo wanawake na watoto wenye ulemavu mbalimbali unaotokana na kufanyiwa vitendo vya kikatili majumbani watahudhuria ili kufanyiwa tathimini ya awali na wataalamu.

Aidha ameongeza kuwa upasuaji huo wa kuboresha maumbile, ngozi iliyokakamaa umeonyesha kuboresha kwa kiwango kikubwa maisha ya wale wanaosumbuliwa na unyanyapaa na ulemavu kwa kurudi katika hali yao ya kawaida na kufanya shughili za kimaendeleo.

Hata hivyo Programu hii ilianzishwa mnamo Januari 2016 ikihusisha wapasuaji kutoka Marekani, Canada na Ulaya wakifanya kazi kwa karibu na wanatiba wa Kitanzania ambapo Hadi Sasa operesheni 143 za upasuaji zimefanywa bila gharama yoyote kwa wagonjwa ambao ni wahanga wa ukatili wa majumbani, kuungua na ajali na kurejesha utendaji wa kimwili na mwonekano wa wanawake na watoto wanaoishi katika mazingira magumu.