PROF LIPUMBA KUNGURUMA MBAGARA ZAKHIEM AGOSTI 20

THE CIVIC UNITED FRONT (CUF- Chama Cha Wananchi)

CUF KUUNGURUMA ZAKHIEM JUMAPILI AGOSTI 20, 2023:

Mwenyekiti wa CUF-Chama Cha Wananchi na Mwenyekiti wa Kituo cha Demokrasia Tanzania (Tanzania Center for Democracy) Prof. Ibrahim Lipumba anatarajiwa kuwa Mgeni Rasmi kwenye Mkutano Mkubwa wa hadhara utakaofanyika Viwanja vya Zakhiem, Wilayani Temeke.

Kwenye mkutano huu muhimu wa Mkoa wa Dar es Salaam, masuala mbalimbali yahusuyo Chama na taifa kwa ujumla ikiwa ni pamoja na Mkataba wa Bandari, Hali ya Kisiasa na Demokrasia nchini, mapungufu katika Utawala Bora na Haki za Kibinadamu nchini, Hali ya Umaskini nchini na masuala mengine muhimu yatadadavuliwa  siku hiyo.

Mwenyekiti wa Chama Prof. Ibrahim Lipumba atasindikizwa na Katibu Mkuu Eng. Hamad Masoud Hamad, Wakurugenzi na Wajumbe kadhaa wa Baraza Kuu la Uongozi la Taifa.

CUF-Chama Cha Wananchi Mkoa wa Dar es Salaam kimeamua kuupeleka Mkutano huo Zakhiem ili kuhuisha harakati za 'CUF NGANGARI KINOMA' huku tukizingatia umuhimu wa Zakhiem katika historia za Mapambano ya Kidemokrasia nchini.

Tunatoa wito kwa wanachama wa CUF- Chama Cha Wananchi, wananchi wote wa Dar es Salaam na mikoa ya jirani kujitokeza kwa wingi katika Mkutano huu muhimu sana kwa watanzania wote. Ni muda muafaka sasa wa kutofautisha Siasa za Kiharakati na Siasa za Masuala na hoja za kweli za kumkomboa mtanzania ambaye Takwimu za kutegemewa za Kimataifa zinadhihirisha kwamba ameendelea kukosa furaha muda mrefu kutokana na maisha magumu yanayosababishwa na Serikali ya CCM iliyoshindwa kumletea kabwela nafuu kwa miaka yote zaidi ya 59 ya uhai wa Tanzania.

HAKI SAWA NA FURAHA KWA WOTE!

Eng. Mohamed Ngulangwa

Mkurugenzi wa Habari Uenezi na Mahusiano na Umma

 CUF- Chama Cha Wananchi

Agosti 15, 2023