BODI YA WATAALAMU WA UNUNUZI NA UGAVI (TSPTB) KUFANYA ZIARA YA KITAALUMA KATIKA MIKOA 10

Bodi ya wataalamu wa ununuzi na ugavi (TSPTB) inatarajiwa kufanya ziara ya kitaaluma katika mikoa takribani kumi kwa lengo la kuzungumza na umma wa wanafunzi wa vyuo vikuu mbalimbali nchini wanaosomea  fani ya ugavi na ununuzi kwa umma sambamba na mafunzo yatakayofanyika siku ya tarehe 25 februari  mwezi huu jijini Dar es salaam.

Akizungumza na waandishi wa habari mapema leo jijini Dar es salaam kaimu mkurugenzi mtendaji wa Bodi ya wataalam wa ugavi na ununuzi (PSPTB), Bw. Godfred Mbanyi alisema ziara hizo imelenga kuwaelimisha wanafunzi wa fani hiyo juu ya maadili ya ugavi na ununuzi wa umma,

Alisema mafunzo hayo yatatolewa kwa viongozi wote pamoja na jumuiya ya wanafunzi  wa ununuzi na ugavi ambayo yatawajengea uwezo wa kuwaandaa kulitumikia Taifa kwa uzalendo watakapomaliza.

Aidha bwana Mbanyi aliongeza kuwa ufanyaji wa mitihani ya kitaaluma chini ya mtaala uliothibitishwa na taasisi ya kimataifa pamoja na majukumu ya bodi ya usajili kwa kuwajengea uwezo wa kuwa na mawazo chanya ili kujenga uchumi wa viwanda nchini.

Wakati huo huo bodi hiyo inatarajia kuendesha kongamano la siku moja la vijana  ambao wanasomea fani ya ununuzi na ugavi nchini.

Aliongeza kuwa sambamba na kongamano hilo pia bodi hiyo inataraji kutembelea vyuo vikuu mbalimbali nchini vinavyofundisha masomo ya ugavi na kutoa mafunzo na kuvitaja vyuo hivyo kuwa ni chuo cha usafirishaji (NIT)  kilichopo Dar es salaam, CBE Dodoma  na Mwanza, chuo kikuu cha Jordani na Mzumbe kilichopo Morogoro.

Amevitaja vyuo vingine kuwa ni  chuo cha uhasibu Mwanza, Mbeya na Mtwara (TIA), St.John, UDOM vilivyopo Dodoma, IAA na Chuo kikuu cha Arusha, SMMUCO NA Mocu vya Moshi, Green Bird kilichopo Mwanga, RUCU Iringa na SAUTI kilichopo Mwanza na Mtwara.