Tamko La Asasi Za Kiraia Kuhusu Muswada Wa Mabadiliko Ya Sheria Ya Asasi Za Kiraia Nchini

Mratibu wa Kitaifa wa Mtandao wa Watetezi wa Haki za Binadamu Tanzania (THRDC), Bw.Onesmo Olengurumwa akiongea na waadau mbalimbali walioweza kuhudhulia katika mkutano wa dharura ulioandaliwa na Asasi za Kiraia Jijini Dar es Salaam leo.

Dar es salaam:

Asasi za Kiraia wamekutana kwa pamoja kujadili mswada wa mabadiliko ya sheria mbalimbali zinazoongoza Asasi  hizo na kutoa tamko lao kwa Bunge na Serikali kurekebisha baadhi ya vifungu ambavyo kama Muswada huo utapita kutakuwa na mazingira magumu ya utendaji kazi wa Asasi za Kiraia ikiwemo kufutwa kwa baadhi ya Asasi nchini.

Akizungumza jijini Dar es Salaam Mratibu wa Kitaifa wa Mtandao wa Watetezi wa Haki za Binadamu Tanzania (THRDC), Bw.Onesmo Olengurumwa alisema kuwa Mei 30 mwaka huu serilaki iliwasilisha Muswada kwa hati ya dharula wa Mabadiliko ya Sheria mbalimbali ambao umezua sintofahamu na taharuki kwa AZAKI za ndani na nje ya nchi na huenda lengo lilikuwa kutokushirikisha AZAKi ambao ni walengwa wakuu kwenye Muswada huo.

“Tarehe 21 na 22 mwezi Juni mwaka huu baadhi ya AZAKi ziliweza kuwasilisha mbele ya kamati za Bunge mjini Dodoma, Leo pia tumekutana hapa kwa dharura ili kujadili mapendekezo yetu na pamoja na kutoa taarifa kwa umma juu ya Muswada huu, kutokana na Umma kupaswa kujua athari za Muswada huu sio kwamba utaathiri AZAKi pekee bali kila mtu ataathirika kutokana na kuwa AZAKi zipo kutoa huduma za kijamii, kuleta maendeleo na ajira katika nyanja mbalimbali”. Alisema Bw.Olengurumwa.

Alisema kutokana na uchambuzi wa awali uliofanywa na Asasi za Kiraia zaidi ya 300 kuhusu Muswada huo walibaini kuwa ikiwa Muswada utapita kama ilivyo sasa utaleta changamoto nyingi kwa AZAKI hasa katika  utekelezaji wake na uendeshaji wa AZAKi nchini.

Nae Mkurugenzi wa Baraza la Mashirika yasiyo ya Kiserikali (NaCoNGO), Bw. Ismail Suleimani alisema mara baada ya kupitia Muswada huo wamegundua kuwepo na changamoto na madhara mengi yatatokea endapo Muswada huo utapita.

“Muswada huu ukipita AZAKi zote zilizosajiliwa chini ya Sheria ya Makampuni ambayo hayakuomba Hati ya kukubaliwa kufanya kazi kama mashirika yasiyokuwa ya kiserikali ya mwaka 2002 yatatakiwa kufanya kazi kama makampuni ya kibiashara kwa mujibu wa sheria ya makampuni na iwapo yatashindwa kufanya hivyo ndani ya muda wa miezi miwili yatafutiwa usajili bila ya kupewa taarifa”. Alisema Bw. Suleiman.

Wadau mbalimbali wakiwa wanafuatilia mjadala katika mkutano wa dharura ulioandaliwa na Asasi za Kiraia Jijini Dar es Salaam.