MHANDISI KUNDO AELEZEA MABORESHO YA UENDESHAJI SHUGHULI ZA POSTA KIDIGITALI

Naibu waziri wa habari, mawasiliano na Teknolojia ya Habari Mhandisi Matthew Kundo akifafanua jambo katika ufunguzi wa kikao cha 41 cha Baraza la Utawala la Umoja wa Posta Afrika (PAPU) kinachoendelea Jijini Arusha.

Mwenyekiti wa Baraza la Utawala la PAPU, Richard Ranarison akizungumza Katika ufunguzi wa kikao cha 41 cha Baraza la Utawala la Umoja wa Posta Afrika (PAPU) kinachoendelea Jijini Arusha.

Arusha

Naibu waziri wa habari, mawasiliano na Teknolojia ya Habari Mhandisi Matthew Kundo ameitaka Posta Tanzania kuendana na kasi ya utoaji wa huduma kidigitali Ambapo serikali imeshaanza jitihada za kuweka WiFi katika maeneo mbalimbali hapa nchini.

Akizungumza jijini Arusha, Naibu Waziri wa habari, wakati akifungua kikao cha 41 cha Baraza la Utawala la Umoja wa Posta Afrika (PAPU) kinachoendelea Jijini hapa.

Mhandisi kundo amesema Serikali inajipanga kuimarisha huduma za mawasiliano nchini, kwa kuweka mtandao wa Intaneti wa bure (WiFI) kwenye mikusanyiko yote, vyombo vya usafiri na kwenye shule, ili kila mwananchi apate huduma hiyo bila usumbufu wowote.

Amesema uwekaji huo wa Intaneti za bure, zitasaidia wananchi kupata huduma za mawasiliano popote wanapokuwa na kuendelea na shughuli zao za kijamii, bila mkwamo wa ukosefu wa huduma hiyo.

“Serikali ya awamu ya sita imejipanga, tunataka kuhakikisha umoja huu na wenzetu unaboresha mifumo ya utendaji kazi na kua ya kidijitali na sisi kama Tanzania tukiwa wanachama wa umoja huu Afrika na Duniani, tumeanza mikakati."

Amesema miongoni mwa makubaliano yaliyowekwa na Umoja wa Posta Afrika ni pamoja na kuboresha miundo mbinu yetu ya Mawasiliano kwa kuweka sawa sera yetu ya posta ya mwaka 2003, ”amesema

Amesema mojawapo ya maboresho hayo ni ujenzi wa minara, mkongo wa Taifa na uwekaji wa Anuani za Makazi, ili kuhakikisha shughuli zote za posta zinafanyika vizuri na wananchi wanapata huduma za kijamii bila usumbufu.

Aidha, amesema Rais Samia Hassan Suluhu mwaka jana Februari 8 alihakikisha Tanzania kunakua na Anwani za makazi na hilo lilifanyika kwa ufanisi, ambapo kwa sasa kila mmoja anaona faida yake katika upatikanaji wahuduma za kijamii na hata posta inakua rahisi.

“Tunavyoelekea kutoa huduma zote kidijitali ni lazima kuhakikisha uwezo wetu kimtandao unakua imara ili ifike mahali, kila mmoja asione umuhimu wa kutembea na fedha tasilimu, bali kadi tu na kupata kila aina ya huduma mtu anayohitaji kupata,”amesema

Awali Mwenyekiti wa Baraza la Utawala la PAPU, Richard Ranarison, amesema umoja huo unakusudia kutoa huduma bora na kwa wakati kwa kila nchi na ili kufikia lengo hilo, kila wanapokutana kwenye vikao vyao vya kila mwaka wanaangalia wapi walipo na wanapoelekea na penye dosari wanazirekebisha.

Hata hivyo kikao hicho, kimefanyika ikiwa ni mfululizo wa vikao , kwa ajili ya kuandaa ajenda ya pamoja kwa nchi za Afrika, ili kuziwasilisha katika kikao cha Baraza la Posta Duniani kitakachofanyika Oktoba mwaka huu.