WATU WAKIRUDI KWENYE MFUMO WA 'CASH MONEY' SERIKALI ITAPOTEZA FEDHA NYINGI- WAKILI OLENGURUMWA

Wakili Onesmo Olengurumwa ambaye ni Mratibu wa Mtandao wa Watetezi wa Haki za Binadamu Nchini (THRDC) ametoa maoni binafsi kuhusu tozo mpya kwenye miamala ya huduma za kibenki ambapo amesema kuwa zitapelekea wananchi kurudi kwenye utamaduni wa zamani wa kutunza pesa kwenye vibubu na kutembea na pesa taslimu (cash money) hali ambayo amedai kuwa inaweza kuleta madhara kiuchumi.

Akizungumza baada ya kuibuka kwa mijadala kuhusu tozo mpya kwenye miamala ya huduma za kibenki ambazo zimeanza kutozwa hivi karibuni baada ya mwaka mpya wa fedha 2022/2023 kuanza, amesema kuwa watanzania bado watanzania walio wengi hawatumii huduma za kibenki hivyo kuwekwa kwa tozo hizo kutafanya watanzania kurudi kwenye mifumo ya kizamani ikiwemo kutunza pesa kwenye vibubu pamoja kukaa na pesa taslimu (cash money) hali ambayo amedai kuwa inapelekea madhara kwenye uchumi.

"Watanzania wanaotumia benki hawafiki hata asilimia tano(5%) sasa ukienda kuingiza ghalama za kuweka na kutoa pesa kwenye benki unafanya watanzania warudi kwenye mifumo ya vibubu kuweka pesa majumbani, warudi kwenye cash money (pesa tasrimu), Cash money ina madhara sana kwenye uchumi."amesema Wakili Onesmo Olengurumwa

Wakili Olengurumwa ameongeza kuwa "Watu wakirudi kwenye mfumo wa cash money Serikali itapoteza pesa nyingi sana lakini Serikali itashindwa hata kupambana na uharifu wa kifedha kwa sababu kupia mifumo hii ya simu, mifumo ya benki ni rahisi kufahamu mtiririko wa pesa inatoka wapi inaenda wapi."

Aidha ameshauri ili kuepuka hali ya sintofahamu inayoleta mijadala na malalamiko awali inapokuwa inafanyika michakato yoyote kwenye kuboresha uchumi hususani kuongeza vyanzo vya mapato katika taifa vinavyogusa wananchi kuwa ni muhimu kuwepo na mijadala ya awali pamoja na ushirikishwaji wa kutosha kwa jamii.

"Tunapojaribu kufanya michakato yoyote ya kuboresha uchumi wetu, kuboresha vipato vya kitaifa lazima tuangalie na tunapogusa mambo ya kitaifa yanayogusa watanzania kama suala la tozo kwenye miamala tunapasa kuanza na mijadala ya kitaifa ndio maana nasema vitu vingi vinakuja pasipo ushirikishwaji mkubwa wa jamii. Sidhani kama watanzania wameshawishiwa na mh. Rais pamoja na wa wadau wengine kwamba wachangie halambee ya kuchangia maendeleo ya taifa lao kwa njia nyingine kama kupitia tozo na vingine, ikiwa hivyo hamna tatizo" amesema Wakili Onesmo Olengurumwa

Katika hilo amesema kuwa wananchi wamekuwa wakiona baadhi ya mambo yakiibuka ikwemo kufanya marekebisho ya sheria na vifungu ambavyo vinakuja kuwabana.

"Kitu kinachoonekana hapa mambo yameibuka na kuzuka wananchi wanayaona yakiwajia sheria zinafanyiwa marekebisho, vifungu vinawekwa vinakuja kuwabana watanzania na hali tuliyonayo yakiuchumi vijana wanaangaika kutafuta rasilimali ukiwaongezea mazingira kama hayo hali inakukwa ngumu" amesema Onesmo Olengurumwa

Hata hivyo Wakili Onesmo Olengurumwa ameshauri wadau kutoishia tu kwenye mijadala na kutoa malalamiko badala yake watumie Mahakama ili iweze kutoa tafsiri uhalali wa tozo hizo.