Dkt. Tiboroha Atambulishwa Rasmi Azam FC

KLABU ya Soka ya Azam FC imemtambulisha Dkt. Jonas Tiboroha kuwa Mkurugenzi Mpya wa Masuala yote ya Mpira 'Soka' pamoja na kuzindua Kauli Mbiu ya Msimu kwa 2021/22 isemayo Azam FC: Kimya Kimya ikiwa zimepita siku mbili baada ya kuzindua nembo mpya ya klabu hiyo.

Akizungumza na wanahabari leo jijini Dar es Salaam katika Hafla ya utambulisho huo, Afisa Mtendaji Mkuu wa Azam FC, Abdulkarim  Amin 'Popat' amesema wameamua kumpa nafasi hiyo Dkt. Tiboroha kutokana na uzoefu alionao katika masuala ya soka na kwamba wanategemea kuifikisha klabu hiyo mbali.

"Tumeamua kumtabulisha Dkt. Jonas kuwa mkurugenzi wa masuala yote ya mpira wa klabu yetu kwa uzoefu wake tunategemea atatusaidia kutimiza malengo iliyojiwekea, " amesema Popat.

Amebainisha kuwa kwa muda mrefu watu wanamtambua yeye CEO pekee wa klabu hiyo pamoja na watendaji wengine hivyo wamemtambulisha Dkt. Tiboroha kuitumikia klabu hiyo kwa kipindi cha mwaka mmoja lengo likiwa kuisaidia timu hiyo kufikia malengo na kuendelea kuwa imara na kuiboresha timu hiyo. 

Kwa upande wake Dkt. Tiboroha ameishukuru klabu hiyo n uongozi mzima kwa kumwamini kumpatia nafasi hiyo hivyo anajiona mwenye bahati  na kwamba ana deni kubwa la kuifanyia Azam FC.

Amefafanua kuwa atahakikisha anaisaidia klabu hiyo kutimiza malengo yaliyowekwa na klabu yanafikiwa kwa kuangalia majukumu yote yaliyomo kwenye mpango kazi.

Naye Mkuu wa Kitengo cha Mawasiliano wa klabu hiyo, Thabit Zacharia 'Zaka za Kazi' amesema baada ya uzinduzi wa nembo ya klabu hiyo wameamua kuja na kauli mbiu hiyo kwano msimu ujao mambo yao yatafanyika kimya kimya.

Hussein Ndubikile, Dar es Salaam