Naibu Waziri Dk.Ndungulile Azindua Cheti Cha Mfumo Wa Uhakiki Ubora Wa Huduma Katika Kiwango Cha Kimataifa Tfda

Naibu Waziri wa Afya, Maendeleo ya Jamii, Jinsia, Wazee na Watoto, Dkt. Faustine Ndugulile akizungumza wakati wa hafla ya uzinduzi wa Cheti cha Mfumo wa Uhakiki Ubora wa Huduma cha Kiwango cha Kimataifa (ISO 9001:2015) leo Jijini Dar es Salaam. TFDA imekuwa ya kwanza miongoni mwa mamlaka zinazoshughulika na udhibiti wa ubora wa chakula na dawa katika ukanda wa Afrika Masharika kutunikiwa cheti hicho.

Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile  na watendaji wa TFDA wakiwa wameshishika cheti cha mfumo wa Uhakiki Bora katika Kiwango cha Kimataifa Cha ISO 9001-2015.

Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile akitoa maelekezo mbele ya Mkurugenzi Mkuu wa Mamlaka ya Chakula, Dawa na Vipodozi (TFDA)  Hiiti Sillo wakatikati na Mwenyekiti wa Bodi ya TFDA Dkt Ben Moses.

Meneja Uchunguzi wa Dawa na Vipodozi Dkt. Yonah Hebron akitoa maelekezo mbele ya Naibu Waziri Dkt. Faustine Ndugulile wakati akitembelea maabara katika viunga vya Mamlaka hiyo jijini Dar es Salaam, kulia kwa Naibu Waziri ni Mkurugenzi Mkuu wa Mamlaka ya Chakula, Dawa na Vipodozi (TFDA)  Hiiti Sillo.

Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile akiangalia baadhi ya bidhaa zinazopelekwa TFDA kwa ajili ya Uchunguzi.

Dar es salaam:

Naibu Waziri Wa Afya, Maendeleo Ya Jamii, Jinsia, Wazee Na Watoto Dkt. Faustine Ndugulile ameitaka Mamlaka ya Chakula, Dawa na Vipodozi TFDA kuendelea kuboresha mifumo ya udhibiti wa uingizaji wa  Dawa, Vipodozi na Chakula nchini ili kulinda afya ya Watanzania.

Akizungumza mapema leo jijini dar es salaam mara baada ya kuzindua cheti cha mfumo wa uhakiki ubora wa huduma katika kiwango cha kimataifa cha ISO 9001-2015 alisema mamlaka hiyo imekuwa ikitekeleza maujukumu yake kwa ufanisi zaidi jambo katika kuhakikisha kuwa afya zinalindwa na kuwa na wanachi wenye afya njema kuweza kufanya kazi kuliletea maendeleo taifa katika ujenzi ujenzi wa uchumi wa viwanda.

“Dawa ni kitu nyeti sana, hatuwezi kuruhusu dawa feki kuingia nchini, mnafanya kazi nzuri sana katika nyanja hii  na muendelee na mpango huu ili kudhibiti uingizaji wa vyakula visivyokidhi viwango na mahitaji ya watanzania, ” alisema Dkt.  Ndugulile.

Aidha Dkt. Ndugulile aliongeza kuwa TFDA kwa kushirikiana na Shirika la Viwango Tanzania (TBS) wanatakiwa kuhakikisha wanazingatia miongozo ya kupitisha vyakula na vipodozi kwenye mipaka ya nchi kwa kuzingatia ubora na viwango vilivyoweka hili kudhibiti uingizaji mbovu wa vyakula visivyo na ubora.

Kwa upande wake Mkurugenzi Mkuu wa TFDA Bw. Hiiti Silo alisema ili kuendelea kukidhi matakwa ya wateja na mahitaji yao wameamua kuendana na kiwango cha kimataifa na kuwaita ISO kuja kuhakiki ambapo wamefanikiwa kukidhi na kupata cheti.

“Shirika la Viwango la Kimataifa ISO limehakiki ubora wa huduma zetu katika kukidhi mahitaji na matakwa ya watumiaji wa huduma zetu na kutupatia cheti kinachoturuhusu kutoa huduma nchini” alisema Bw. Sillo.

Aidha Bw. Sillo aliongeza kuwa Mamlaka ya Chakula, Dawa na Vipodozi  TFDA itaendelea kutekeleza majukumu yake bega kwa bega na Serikali ya awamu ya tano ianyoongozwa na Rais Dkt. John pombe Magufuli katika kusogeza mbele gurudumu la afya hapa nchini kupitia taasisi  ya hiyo.